Семинари иттилоотӣ дар доираи ҳамкорӣ бо агентии Иёлоти Муттаҳидаи Амрико барои рушди байналмилалӣ (USAID)

Санаи 24-уми январи соли 2025 дар Донишгоҳи технологии Тоҷикистон семинари иттилоотӣ аз ҷониби намояндагони Лоиҳаи USAID оид ба рушди соҳибкорӣ ва таъсиси ҷойҳои корӣ дар Тоҷикистон (EEDA) бо устодон ва кормандони донишгоҳ баргузор гардид.

Дар семинар намояндагони пешбурди лоиҳаи мазкур Камолиддинов Парвиз ва Рабеҷонова Муҳиба иштирок намуда, ҳадафҳои асосӣ ва талаботҳо вобаста ба таҳия ва пешниҳоди дархостҳои лоиҳавиро ҷиҳати соҳиб шудан ба гранти молиявӣ муаррифӣ намуданд.

Муовини роҳбари лоиҳа Камолиддинов Парвиз зимни муаррифии лоиҳа иброз намуд, ки лоиҳаи мазкур мувофиқи барномаҳои гуногуни давлатии Ҷумҳурии Тоҷикистон таҳия шуда, ба таъсиси ҷойҳои корӣ, рушду ривоҷи экосистемаи соҳибкорӣ ва инчунин, илова намудани арзиш ба маҳсулот, тавассути вусъатдиҳии занҷираи истеҳсолӣ дар соҳаҳои нассоҷӣ, коркарди маҳсулоти кишоварзӣ ва технологияҳои иттилоотӣ дар Ҷумҳурии Тоҷикистон ва ба ин васила ба афзоиши маҳсулнокӣ, такмили малакаи корӣ ва густариши тиҷорат мусоидат хоҳад кард.

Намояндагони пешбурди лоиҳа роҷеъ ба ҳамкориҳои донишгоҳ бо корхонаҳои истеҳсолии давлатию бахши хусусӣ баҳри такмили барномаҳои омӯзишӣ барои омода намудани мутахасисони баландихтисоси ба талаботи бозори меҳнати муосир ҷавобгӯ дар доираи имкониятҳои мавҷудаи Лоиҳаи EEDA ибрози ақида намуданд.

Дар фарҷоми семинар миёни намояндагони Лоиҳаи EEDA ва устодону кормандони донишгоҳ вобаста ба омода ва пешниҳод намудани лоиҳаҳо ва дархостҳои грантӣ дар доираи талаботҳо ва имкониятҳои маблағгузорӣ музокирот ва саволу ҷавобҳо сурат гирифт.