Конференсияи ҷумҳуриявии илмӣ-амалӣ таҳти унвони “Cаҳми занон дар рушди давлатдории муосири тоҷик”

Дар доираи нақша чорабиниҳои ҷумҳуриявӣ ва дохилимуассисавӣ 5 -уми марти соли ҷорӣ дар Донишгоҳи технологии Тоҷикистон бо иштироки ҳайати васеи омӯзгорзанону донишҷӯдухтарон ва меҳмонони воломақом конфренсияи ҷумҳуриявии илмӣ-амалӣ таҳти унвони “Саҳми занон дар рушди давлатдории муосири тоҷик” баргузор гардид.

Дар кори конфронси мазкур ректори Донишгоҳи технологии Тоҷикистон – Раҳмонзода Зоир Файзалӣ, Муовини Сарвазири ҷумҳурӣ – Мансурӣ Дилрабо Сайдулло, Муовини раиси шаҳри Душанбе – Одилзода Дилбар Одил, Муовини раиси ҲХДТ – Абдуллозода Умеда Бекмурод, Вакили Маҷлиси намояндагони Маҷлиси Олии ҶТ – Тағойзода Сумангул Саид ва Вакили Маҷлиси намояндагони Маҷлиси Олии ҶТ – Бобоҷониён Раъно Маҳмудзода иштирок ва маърӯзаҳо намуданд.

Дар қисмати аввали конфронс ректори Донишгоҳ Зоир Раҳмонзода ҳамаи иштирокдоронро хайрамақдам гуфта, зикр намуд, ки Рӯзи Модар дар оғози зеботарин фасли сол – Баҳори нозанин фаро мерасад, ин рӯзи мубораку фархундаро ба ҳамаи занону донишҷӯдухтарони Донишгоҳ ва меҳмонон табрику таҳният гуфта, барояшон саломатӣ, саодати рӯзгор ва дар фаъолияти илмию омӯзгорӣ, таҳсил ва кору пайкорашон барору комёбӣ таманно намуд.

Мавсуф зикр кард, ки эълон гардидани Рӯзи Модар дар кишвари соҳибистиқлоламон амри тасодуфӣ набуда, бо суннатҳои қадимӣ ва анъанаҳои неки ниёгонамон такя мекунад. Маҳз модарон ҳастанд, ки бо қалби бузургу ҳастии хеш ба ин ҷаҳон сидқу сафо ва меҳру вафо мебахшанд.

Президенти кишварамон, Пешвои муаззами миллат муҳтарам Эмомалӣ Раҳмон дар яке аз суханрониҳояшон ба ифтихори Рӯзи модар иброз доштанд, ки “Модар сароғози ҳастии башар, офаранда ва идомабахши ҳаёти инсоният мебошад. Замири ӯ аз меҳру муҳаббат ва лутфу меҳрубонӣ сиришта шудааст, ки ин хислатҳои наҷиб модарро мавҷуди бузургу муқаддаси тамоми давру замонҳо гардонидаанд”.

Модар ягона мавҷуди мушфиқу ғамхор ва мунису меҳрубонест, ки ба фарзанд ҳаёт мебахшад, сухан гуфтану роҳ рафтанро ёд медиҳад, ӯро тарбия мекунад ва дар раванди тарбия дар қалби фарзанди худ эҳсоси муҳаббату самимият, некию накукорӣ ва инсондӯстиро ба вуҷуд меоварад, барои босаводу соҳибмаърифат ва соҳиби касбу ҳунар шудани фарзандаш саъю талош менамояд.

Муовини Сарвазири Ҷумҳурии Тоҷикистон – Мансурӣ Дилрабо Сайдулло занону бонувонро ба ҷашни Рӯзи Модар муборакбод намуда, ёдовар шуд, ки занону бонувон ҳамеша таҳти ғамхориву сарпарастии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор доранд. Бо боварии комил гуфта метавонем, ки имрӯзҳо занон ва бонувон дар тамоми сохторҳои давлатӣ дар радифи мардҳо сарбаландона кору пайкор карда истодаанд. Ва ин ба он далолат менамояд, ки баробарии гендерӣ дар Тоҷикистон комилан риоят карда мешавад.

Дар идомаи конфронс, Муовини раиси шаҳри Душанбе – Одилзода Дилбар Одил низ занону модаронро ба омад – омади фасли баҳор ва Рӯзи Модар табрик гуфта қайд намуд, ки дар пешрафту шукуфоии шаҳри Душанбе саҳми занон хеле назаррас ва боиси таҳсин аст. Занону бонувон дар сохторҳои хоҷагии халқи Душанбешаҳр софдилона ифои вазифа намуда, дар рушди иҷтимоиёт ва иқтисодиёт саҳми арзандаи хешро гузошта истодаанд.

Ҳамчунин Муовини раиси ҲХДТ – Абдуллозода Умеда Бекмурод ҳамаи бонувони иштирокчиро ба Рӯзи Модар табрику муборакбод карда, изҳор дошт, ки занон низ дар пешрафту инкишофи ҲХДТ пайваста саҳми боризи худро гузоша истоданд. Яке аз фаъолияти меҳварии ҲХДТ ин мунтазам дастгириву роҳнамоии занону бонувон буда, ҳамасола онҳо ба сафи ҳизб ҷалб карда мешаванд ва беҳтаринҳояшон бо ифтихорномаву сипоснома ва тӯҳфаҳои хотиравӣ сарфароз гардонида мешванд.

Инчунин Тағойзода Сумангул Саид – Вакили Маҷлиси намояндагони Маҷлиси Олии ҶТ маърӯза намуда, зикр кард, ки саҳми занону бонувон дар рушду пешрафти Парлумони кишвар назаррас аст. Занону бонувон дар Парлумон ба ҳайси Вакил кору фаъолият карда, дар ҳаёти сиёсии кишвар фаъолона ширкат меварзанд.

Дар ҷараёни конфронс, инчунин Бобоҷониён Раъно Маҳмудзода – Вакили Маҷлиси намояндагони Маҷлиси Олии ҶТ омӯзгорзанону донишҷӯёни Донишгоҳро ба Рӯзи Модар муборакбодӣ намуда, ба ҳар яки онҳо саодати рӯзгор, зиндагии хушу осуда ва оғози пур аз ҳаводиси хубро орзу намуд. Номбурда зикр намуд, ки ҳиссаи арзандаи занону бонувон дар қонунгузории мамлакат бориз буда, дар қабули санаду қарорҳои дахлдор боҷуръатона изҳори андеша менамоянд.

Пас аз анҷоми қисми аввали конфронси мазкур аз ҷониби Раёсати Донишгоҳ меҳмонони воломақом ва занону бонувону донишҷӯдухтарони Донишгоҳ чун анъана бо сипосномаву ифтихорнома ва тӯҳфаҳои хотиравӣ қадрдонӣ гардиданд.

Дар қисмати дуюми ҳамоиш барномаи фарҳангӣ – фароғатии ансамбли “Зуҳал”-и Донишгоҳ баргузор гардид, ки онҳо бо суруду таронаҳои дилнишин оид ба модар, ватандӯстонаву саршор аз ҳуввияти миллӣ хотири иштирокдоронро болида гардониданд.

Дар фарҷом, Раёсати донишгоҳ бори дигар тамоми модарону бонувони азиз ва донишҷӯдухтарони донишгоҳро ба ифтихори Рӯзи Модар табрик гуфта, ба ҳар яки онҳо хонаи обод, бахту иқболи нек, файзу баракат ва дар ҳаёти оилавӣ меҳру муҳаббати самимиро орзу намуданд.

Ид муборак бошад, модарону бонувони азиз!

ДТТ, 05.03.2025