ш. Душанбе, кӯч. Н.Қаробоев 63/3
Дар таърихи 3 январи соли 2025 дар Донишгоҳ гузориши ректор Раҳмонзода З.Ф. оид ба фаъолияти Донишгоҳи технологии Тоҷикистон дар соли 2024 баргузор гардид.
Зимни баромад Зоир Файзалӣ иброз дошт, ки раёсати Донишгоҳи технологии Тоҷикистон дар давраи ҳисоботӣ ҷиҳати татбиқи дастуру супоришҳои саривақтии Асосгузори сулҳу ваҳдати миллӣ – Пешвои миллат, Президенти кишвар, Ҷаноби Олӣ, муҳтарам Эмомалӣ Раҳмон, ки аз Паёмҳояшон ва зимни вохўриҳо бо ҷавонон, зиёиён ва аҳли ҷамоатчигии мамлакат дар соли сипаригашта баён доштанд, инчунин амалӣ намудани Қарорҳои Ҳукумати ҶТ, Вазорати маориф ва илми ҶТ, Вазорати саноат ва технологияҳои нави ҶТ, мақомотҳои ҳокимияти давлатии шаҳри Душанбе ва ноҳияи Фирдавсӣ як қатор корҳоро ба сомон расонид.
Дар ин давра, ҷиҳати амалӣ гардонидани сиёсати маорифпарваронаи давлату Ҳукумат, Донишгоҳ фаъолияти худро дар чаҳорчӯбаи амалишавии бандҳои дахлдори як қатор Стратегия ва барномаҳои давлатӣ ба роҳ монда, баҳри баланд бардоштани сифати таълиму тарбия дар Донишгоҳ, омода намудани мутахассисони баландихтисоси ба талаботи бозори меҳнат рақобатпазир, афзун намудани дастовардҳои илмӣ ва ба ин васила саҳмгузор будан дар пешрафти иқтисодиёт ва иҷтимоиёти Тоҷикистони соҳибистиқлол як қатор нақша-чорабиниҳо таҳия намуда, онҳоро зина ба зина амалӣ намуд.
Қайд карда шуд, ки новобаста аз мушкилиҳои ҷойдошта, Донишгоҳ дар соли 2024 дар самтҳои асосии фаъолияташ ба дастовардҳои муайян соҳиб гардид.
Аз ҷониби ректори Донишгоҳ Раҳмонзода З.Ф. самтҳои таълим ва тарбия, илм ва инноватсия, равобити хориҷӣ ва молиявию хоҷагидорӣ таҳлилу баррасӣ гардида, ба масъулин дар соли 2025 ҷиҳати иҷрои саривақтии вазифаҳои ба уҳдаашон гузошташуда, супоришҳои мушаххас дода шуд.
Муовини ректор Ғафоров Ф.М., мушовири ректор Тошматов М.Н. ва раиси Иттифоқи касабаи Донишгоҳ Тағойназарзода Ф. оид ба муҳтаво, таҳлил, баррасӣ, дастовардҳо ва масъалагузориҳо дар музокирот суханронӣ намуда, дар маҷмӯъ натиҷагирии солро мусбӣ арзёбӣ намуданд.
Дар фарҷоми ҷаласа 30 нафар устодоне, ки аз курсҳои такмили ихтисос гузаштанд бо дипломҳо ва омӯзгорону кормандоне, ки солро бо муваффақият ҷамъбаст намуданд бо ифтихорномаҳо қадрдонӣ карда шуда, инчунин ба хонандагони Литсейи инноватсионии Душанбеи назди Донишгоҳ, ки ғолибони озмунҳои ҷумҳуриявӣ гардида буданд, бо мукофотпулиҳо ва ифтихорномаҳо сарфароз гардонида шуданд.
ДТТ, 03.01.2025
