Маросими ифтитоҳи Маркази таълимии забони кореягӣ ва омодасозии касбии назди Донишгоҳи технологии Тоҷикистон

Санаи 28.02.2025 дар Донишгоҳи технологии Тоҷикистон Маркази таълимии забони кореягӣ ва омодасозии касбии назди Донишгоҳ ифтитоҳ гардид. Дар қисмати ифтитоҳии он ректори Донишгоҳ Раҳмонзода Зоир Файзалӣ, муовини якуми вазири саноат ва технологияҳои нави Ҷумҳурии Тоҷикистон Қурбонзода Исоҷон Ятим, директори Агентии бокортаъминкунӣ дар хориҷаи Вазорати меҳнат, муҳоҷират ва шуғли аҳолии Ҷумҳурии Тоҷикистон Раҷабов Ҷума Абдулҳаевич, собиқ Сафири Ҷумҳурии Корея дар Ҷумҳурии Тоҷикистон Квон Донг Сок, директори Маркази таълимии забони кореягӣ ва омодасозии касбии назди Донишгоҳи технологии Тоҷикистон Сео Джонг Хюн иштирок ва суханронӣ намуданд.

Нахсут ректори Донишгоҳ Раҳмонзода З.Ф. ҳамаи меҳмононро хайрамақдам гуфта, дар идомаи корҳои Маркази мазкур муваффақиятҳо таманно намуд. Ҳамчунин тазаккур дод, ки Ҷумҳурии Тоҷикистон пас аз касби Истиқлоли давлатӣ бо ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар самти сиёсати хориҷии хеш “Сиёсати дарҳои боз”-ро пеш гирифт, ки бо ҳар кишваре ба манфиатҳои миллии мо эҳтиром мегузорад ва муносибати мутаносибу мувозинро пайгирӣ мекунад, равобиту ҳамкориҳо бо он ба роҳ монда мешаванд. Тайи солиёни соҳибистиқлоли ҳамин сиёсати озмудашуда ба кишварҳои дуру наздик ба роҳ монда шуд.

Донишгоҳи технологии Тоҷикистон ҷиҳати ҳамкориҳои илмиву таълимӣ, табодули академӣ ва таҷрибавиро бо донишгоҳу донишкадҳо ва корхонаҳои Ҷумҳурии Корея ба роҳ мондааст ва тайи солҳои ахир якчанд лоиҳаҳои ҳамкориро бо ин кишвари дӯст амалӣ гардонида истодааст.

Ҳамчунин мавсуф ёдовар шуд, ки дар ин замина Донишгоҳ бо мувофиқа ва мусоидати Вазорати саноат ва технологияҳои нави Ҷумҳурии Тоҷикистон дар самти густариши ҳамкориҳо бо ташкилоту созмонҳои кореягӣ, Ёддошти тафоҳуми сеҷониба байни Вазорати саноат ва технологияҳои нави Ҷумҳурии Тоҷикистон, сохтори зертобеи вазорат – Донишгоҳи технологии Тоҷикистон ва Корпоратсияи EFC-и Ҷумҳурии Корея ба имзо расонида буд. Моҳияти ин санад таъсиси фаъолияти Маркази таълимии забони кореягӣ ва омодасозии касбии назди Донишгоҳи технологии Тоҷикистонро дар бар мегирифт.

Дар идома номбурда зикр кард, ки ҳадафи таъсиси Маркази мазкур фароҳам овардани шароити мусоид барои омӯзиши забони кореягӣ ба шаҳрвандони Ҷумҳурии Тоҷикистон мебошад, ки мутобиқшавии ҷавононро ба муҳити нави касбӣ ва ғайрикасбӣ, фарҳангӣ ва иҷтимоӣ тавассути таълиму тадрис ба роҳ монда, ҷиҳати баланд бардоштан ва беҳтар намудани сифати зиндагии онҳо тариқи фаъолият дар ширкату корхонаҳои Ҷумҳурии Корея мусоидат менамояд.

Зимни суханронии худ муовини якуми вазири саноат ва технологияҳои нави Ҷумҳурии Тоҷикистон Қурбонзода Исоҷон Ятим меҳмонони олиқадри аз Ҷумҳурии Кореяи Ҷанубӣ ба Тоҷикистон ташриф овардаро бори дигар хушомадед гуфта, ифтитоҳи маркази мазкурро барои рушди ҳамкориҳои дуҷонибаи ду кишвари бо ҳам дӯст амали муҳиме арзёбӣ намуд.

Директори Агентии бокортаъминкунӣ дар хориҷаи Вазорати меҳнат, муҳоҷират ва шуғли аҳолии Ҷумҳурии Тоҷикистон Раҷабов Ҷума Абдулҳаевич зимни баромади худ ифтитоҳи ин Марказро як падидаи нек хонда, онро ҷиҳати рушди муҳоҷирати меҳнатии қонунӣ як уфуқи тозае номид.

Директори Маркази таълимии забони кореягӣ ва омодасозии касбии назди Донишгоҳи технологии Тоҷикистон Ҷанбои Сео Джонг Хюн ҷиҳати ҳамкориҳои судманди тарафайн изҳори қаноатмандӣ намуда, ба ҳозирин барои ширкаташон дар ин маросим сипосгузрӣ кард. Ҳамчунин қайд намуд, ки Маркази болозикр метавонад забони кореягиро барои ҳаводорони забони кореягӣ ба сатҳи баланд омӯзонад ва онҳоро дар касбҳои гуногуни талаботи замон чун мутахассиони соҳибтахассуси сатҳи байналмилалӣ омода созад, то онҳо ба талаботи бозори меҳнати Ҷумҳурии Корея ҷавобгӯ бошанд.

Бо итминон метавон гуфт, ки оғози фаъолияти ин Марказ як қадами дигар дар самти тавсеаи ҳамкориҳои дуҷониба буда, барои сафарбарнамоии сокинону шаҳрвандони кишвари азизамон ҷиҳати дарёфти ҷойҳои кории расмӣ дар Ҷумҳурии Корея ёрии амалӣ мерасонад. Ҳамчунин ба ин васила дар кам шудани муҳоҷирати меҳнатии ғайриқонунӣ дар кишварҳои пасошуравӣ мусоидат намуда, барои таҳкими дӯстӣ ва ҳусни тафоҳум байни халқҳои Тоҷикистону Корея як падидаи наве хоҳад буд.

ДТТ, 28.03.2025