Конференсияи илмӣ – амалии ҷумҳуриявӣ дар мавзуи «АМНИЯТИ ОЗУҚАВОРӢ – КАФИЛИ СОЛИМӢ ВА ДАРОЗУМРӢ»

Дар доираи амалисозии ҳадафи Стратегияи рушди миллии Ҷумҳурии Тоҷикистон оид ба таъмини бехатарии озуқаворӣ ва эълон шудани солҳои 2022-2026 «Солҳои рушди саноат» дар Донишгоҳ конференсияи илмӣ – амалии ҷумҳуриявӣ дар мавзуи «Амнияти озуқаворӣ – кафили солимӣ ва дарозумрӣ» баргузор гардид.

Нахуст конференсияро ректори Донишгоҳ Раҳмонзода Зоир Файзалӣ ифтитоҳ бахшида, иброз намуд, ки Президенти Ҷумҳурии Тоҷикистон муҳтарам Эмомалӣ Раҳмон дар яке аз Паёмҳои худ ба Парлумони кишвар дастёбӣ ба истиқлолияти озуқаворӣ ва амнияти ҷумҳуриро яке аз ҳадафҳои стратегии давлат номида буданд. Дар ин самт махсусан қайд карданд, ки: “Бахши дигари муҳими иқтисодиёти миллӣ – кишоварзӣ мебошад, ки аз сатҳи тавсеаи он асосан амнияти озуқавории кишвар вобастагӣ дорад”.

Дар идома Зоир Файзалӣ қайд намуд, ки новобаста аз афзоиши талабот ба молу маҳсулоти соҳаи кишоварзӣ, роҳбарияти Ҳукумати Ҷумҳурии Тоҷикистон тавассути барномаҳои давлатӣ дар самти таъмини амнияти озуқаворӣ, аз ҳамаи захира ва имкониятҳо самаранок истифода бурда, рушди манбаъҳои соҳаи кишоварзиро таъмин менамоянд.

Қобили зикри хос аст, ки зимни Паёми имсолаашон Пешвои муаззами миллат ба Ҳукумати мамлакат, Вазорати кишоварзӣ ва вазорату идораҳои дахлдор супориш доданд, ки дар шароити болоравии нархҳо дар бозорҳои ҷаҳонӣ ҷиҳати боз ҳам баланд бардоштани сатҳи таъминоти аҳолӣ бо маҳсулоти ватанӣ барномаи амнияти озуқавории кишварро барои панҷ соли оянда қабул ва амалӣ намоянд.

Ректори Донишгоҳ Раҳмонзода З.Ф. инчунин иброз намуд, ки нақши донишгоҳҳо ва муассисаҳои илмӣ дар омӯзиш, таҳлил ва пешниҳоди роҳҳои ҳалли мушкилоти мавҷуда низ бағоят муҳим аст ва Донишгоҳи технологии Тоҷикистон, ки яке аз донишгоҳҳои пешбари омодасозии мутахассисони баландихтисос дар соҳаи саноати хӯрокворӣ мебошад, дар доираи талаботи барномаҳои таълимӣ ва илмӣ, аз рўйи 9 ихтисос мутахассисони соҳаҳои муҳими технологияи хӯрокворӣ, назорати сифат ва бехатарии озуқаворӣ ва дигар самтҳои марбутро омода мекунад. Раёсати Донишгоҳ барои омода намудани мутахассисони ба бозори меҳнати дохилӣ ва берунаи кишвар ҷавобгӯ мунтазам нақша чорабиниҳо таҳия намуда, онҳоро пайгирона амалӣ намудаистодааст.

Баъдан зимни баромади худ муовини директори КВД «Хӯрокворӣ»-и Вазорати саноат ва технологияҳои нави Ҷумҳурии Тоҷикистон – Солеҳзода Умед суханронӣ намуда, иброз дошт, ки таъмини амнияти озуқаворӣ ва истеҳсоли маҳсулоти ғизои бехатар яке аз самтҳои муҳими сиёсати давлатӣ дар соҳаи саноат ба шумор меравад. Ҳамзамон, муовини директори Агентии стандартизатсия ва нозироти савдои назди Ҳукумати Ҷумҳурии Тоҷикистон – Рустамзода Малоҳат Рустам дар бораи аҳамияти риояи стандартҳои байналмилалӣ ва миллӣ дар истеҳсоли маҳсулоти ғизоӣ андешаронӣ намуд.

Сипас, бо гузоришҳо илмӣ профессор, ходими калони илмии Институти химияи ба номи В.И. Никитини АМИТ – Муҳидинов Зайнидин Қамарович дар мавзуи “Бехатарии озӯқаворӣ дар истеҳсоли шарбати меваҳо”, профессор, мушовири илмии Пажуҳишгоҳи илмӣ-тадқиқотии “Ғизо”-и назди Вазорати саноат ва технологияҳои нави Ҷумҳурии Тоҷикистон – Ҷаҳон Азонов дар мавзуи “Бехатарии ғизо – омили солимии инсон” ва и.в. профессори Донишгоҳи технологии Тоҷикистон Икромӣ Муҳаббат Бобоевна дар мавзуи “Моддаҳои фаъоли биологии ашёи хоми растании маҳаллӣ дар таъмини сифат ва бехатарии махсулоти озуқаворӣ” баромад намуданд.

Дар интиҳо устодон ба музокира баромада, фикру андешаҳои худро байён доштанд.

ДТТ, 28.02.2025